狼振英日夜掛住習近平阿媽

香港《蘋果日報》

狼振英盛傳佢得到專責港澳事務嘅國家副主席習近平力撐，登基在望。究竟隻狼點解搶到位？八方今日就要破解呢單「國家機密」－－其實答案早已寫在振英哥心口。大家有冇留意，佢天天掛喺心口嗰個橙色「齊心」襟章？好一個「齊心」，原來習近平母親個名就係叫齊心。哦！習近平母親，振英掛在心，難怪佢可以步步攀近特區權力核心。

內地老友同八方講，隻狼個競選口號「齊心一意撐香港」暗藏玄機，「齊心」唔係撐香港，只係借花孝敬「老佛爺」。振英哥向市民大派「齊心」襟章。內地官場聽見「齊心」就嗤之以鼻，仲笑住咁話係向中共獻媚嘅技倆。原來北京官場係人都知習近平出名孝順，經常百忙之中抽空返家探望年老母親。佢哋覺得，振英哥力 sell「齊心」，只不過係向阿爺擦鞋。

呢句口號英文係「 One Heart, One Vision, for Hong Hong」，八方問過英語專家古德明，佢話將「 One Heart」繹做「齊心」冇乜問題。但又難怪人哋多疑，皆因隻狼向來好 cool，但係宣佈參選當日，忽然自爆自己阿媽係紮腳，仲聲沙沙咁話，阿媽穿膠花含辛茹苦養大佢。諗番轉頭，習近平重視親情早已係公開秘密，隻狼上演呢幕粵語長片《念親恩》，應該博到阿爺加分。

按「棄唐挺梁」嘅鬧劇發展落去，死口唔認係共產黨員嘅狼振英都幾大機會做特首，屆時習近平若接任國家主席，對振英哥嚟講，到時真係：「爹親娘親不及習主席親，天大地大不如齊心的恩情大」咯！



李八方