《太陽報》
曾蔭權又又又又又爆醜聞，被人踢爆○七年平安夜入住澳門賭廳超豪專房，唔止黐飲黐食，仲黐埋賭徒添。煲呔曾歎盡海陸空，貪盡粵港澳，都算戰績彪炳咯！
呢 單已經係煲呔曾第N單貪腐醜聞，廉價租用「深圳禮賓府」就砌詞話老婆多雜物要放，今次連下一代都搬埋出嚟，話由細仔安排。講大話都唔該用吓腦吖，當年仍在 求學階段嘅細仔邊有咁大面子安排入住賭廳大豪客專用房。除非咁啦，虎父無犬子，如果曾家細仔都係貪腐集團一分子，咁就有可能嘅。
叮佢個鎯鎯，「香港第一貪官」死鴨撐飯蓋，邊個能夠斬妖除貪呢？廉政公署？投鼠忌器嘥聲壞氣。立法會？群丑亂舞偏私護短。北大人？更加唔使諗，神州貪官見到煲呔曾只會惺惺相惜、相見恨晚嘅啫。
咦，咪住先，有個叫「防止及處理潛在利益衝突獨立檢討委員會」嘅東東首次開會喎，唔通研究點樣處理「香港和珅」？好咯！貪官受查，濫權死得，正義有望彰顯咯！
聽吓委員會主席李國能講乜先，佢話，委員會嘅職責係檢討特首、行政會議成員同政治委任官員嘅利益申報制度，下月會舉行諮詢會，五月底向煲呔曾提交報告。吓？乜話？委員會唔係捉貪曾，而係向貪曾報告，又會咁荒謬嘅？
咁都未算，更荒謬嘅係，檢討報告最終有乜改善建議都好，都係由下屆政府開始採用，唔關煲呔曾事o架！咁即係話，份報告寫到天花龍鳳都好，對煲呔曾都起唔到約束作用，更加唔使講查辦佢嘅貪腐罪行。煲呔曾偷食，接任人當災，咁狗嘅做法，真係只有煲呔曾至諗得出咯！
一個幫大貪官粉飾太平嘅委員會，邊個會做呀？答案係，五個「曾朋友」囉。委員會五名成員同煲呔曾關係千絲萬縷，唔係被港府委任重要公職，就係曾經從煲呔曾手中接過授勳星章，檢討報告嘅公信力有幾多，大家心照啦！
吖，差啲唔記得添，委員會主席個名叫李國能，即係○八年獲煲呔曾頒授特區最高榮譽大紫荊勳章嗰個前終審法院首席大法官。計太一叮話齋，「檢討五人組」全部同煲呔曾利益掛鈎，委員會首先防止及處理佢哋嘅潛在利益衝突先啦！
一句講晒，防貪得個樣，檢討係場騷。所謂嘅檢討委員會，根本就係煲呔曾嘅緩兵之計，意圖轉移視線，等自己嘅貪腐醜行可以過骨。各位市民唔好上當，打貪官都係靠自己啦，唔好畀佢停，繼續上街，繼續打「曾小人」，繼續高呼：打倒貪腐，打倒煲呔曾！
没有评论:
发表评论