習近平講話 梁唐營各自解讀

《太陽報》

每年兩會，港區人大同政協都會好緊張領導人講啲乜，今年更加要豎起耳仔聽。尋日國家副主席習近平會見港澳政協委員時，就發表「三大希望」，分別希望政協委員可以更積極地為國家發展建言獻策、更積極地主動參與港澳社會政治事務，以及更團結地維護港澳社會同穩定。

至於點樣維謢社會和諧穩定？習副主席就話，政協委員要積極推動社會各方面顧全大局、理性溝通，進一步促進包容共濟、和諧穩定，仲有一句係「兄弟同心，其利斷金」。對於習副嘅發言，梁營同唐營都各自解讀。

好似率先同習副握手嘅政協委員劉夢熊，就將「兄弟同心，其利斷金」解讀成中央希望某啲人放棄自己利益，顧全大局，不過佢唔敢講中央要邊個放棄。而唐營堅實支持者全國政協常委陳永棋就話，只係劉夢熊提早霸位，做埋啲小動作，先可以第一個握手，唔代表中央挺梁。佢仲話習近平有講穩中求進，正正係唐唐政綱一部分，兩人理念好一致。不過就畀建仔主席譚耀宗即時踢爆，話中央講「穩中求進」講咗好耐，唔係咩新意。